OM konferansen

Visste du at Måløy er Noregs fjerde største fiskerihamn? Her finn du eit sterkt og mangfaldig marint og maritimt næringsliv – med alt frå lakseeksport og havbruk til skipsdesign, pelagisk industri og skipsverft i verdsklasse. Måløy er òg fødestaden til ei rekkje selskap, idear og løysingar som har sett spor i fiskeri- og havbruksnæringa. Difor er det heilt naturleg at vi samlar bransjen nettopp her!

Fiskeri- og havbrukskonferansen i Måløy er ein møteplass for alle som arbeider innan fiskeri, havbruk og tilknytte næringar. Her møtest næringsliv, politikk, forvaltning og akademia for å dele kunnskap, drøfte viktige tema og byggje nettverk. Konferansen byr på fagleg påfyll, spennande innleiarar og ekte historier frå røyndomen – med både lokale røter og nasjonalt utsyn.

Arrangementet er ope for alle, anten du er bransjeaktør, student, investor eller berre nysgjerrig på utviklinga i ei av Noregs viktigaste framtidsnæringar.

Arrangører

ARRANGØR

Anne-Stine Meland

Rådgjevar, Måløy Vekst

  • Anne-Stine Meland er rådgjevar i Måløy Vekst og kompetansekoordinator i Studiesenter Kysten. Ho arbeider med å gjere høgare utdanning tilgjengeleg lokalt og legg til rette for kompetanseheving i næringslivet.

    I arbeidet med Fiskeri- og havbrukskonferansen har ho vore sentral i utviklinga av programmet og har bidrege til å sikre eit fagleg innhald som speglar behova i kystnæringane.

ARRANGØR

Anette B. Jahre

Rådgjevar, Måløy Vekst

  • Anette Botnmark Jahre er rådgjevar i Måløy Vekst. Ho er involvert i fleire prosjekt, mellom anna Biohub Måløy, som er ein del av Grøn region Vestland.

    I arbeidet med Fiskeri- og havbrukskonferansen har ho vore sentral i utviklinga av programmet og i å knyte saman aktørar som bidreg til å belyse nye moglegheiter i sjømat- og havbruksnæringa.

ARRANGØR

Seline Larsen

Kommunikasjonsrådgjevar,
Måløy Vekst

  • Seline Larsen er kommunikasjonsrådgjevar i Måløy Vekst og har ansvar for innhaldsproduksjon og formidling i digitale kanalar, i tillegg til fleire prosjekt innan rekruttering og bu-lyst.

    I samband med Fiskeri- og havbrukskonferansen har ho ansvar for kommunikasjon, marknadsføring og den tekniske gjennomføringa, og bidreg til at både deltakarar og føredragshaldarar får ei profesjonell oppleving.

ARRANGØR

Nina Tysse

Rådgjevar,
Vestland fylkeskommune

  • Nina Tysse arbeider i Vestland fylkeskommune og har brei erfaring frå arbeid med næringsutvikling og kystrelaterte prosjekt.

    Ho har vore ein viktig fagleg ressurs i planlegginga av konferansen, der ho har bidrege med innsikt og perspektiv på korleis fiskeri- og havbruksnæringa kan utviklast i samspel med regional politikk og samfunnsutvikling.

ARRANGØR

Frank Willy Djuvik

Dagleg leiar, Måløy Vekst

  • Frank Willy Djuvik er dagleg leiar i Måløy Vekst og har med seg solid erfaring frå både politikk, næringsliv og samfunnsutvikling. Som tidlegare fylkespolitikar har han lang fartstid i å arbeide for gode rammevilkår og vekst langs kysten.

    Han er ein engasjert pådrivar som brenn for å skape utvikling gjennom samarbeid og nye idear, og har vore ein sentral drivkraft bak etableringa og vidareutviklinga av Fiskeri- og havbrukskonferansen.

FAGLEG RESSURS

Stein Kvalsund

CEO, Hub for Ocean

  • Stein Kvalsund er dagleg leiar i Hub for Ocean, eit nettverk som arbeider for å samle og styrkje kyst- og havnæringane. Han har lang erfaring med næringsutvikling, samarbeid og prosjektleiing, og har bidrege inn i konferansen med verdifull kunnskap om innovasjon, sameksistens og framtidsmoglegheiter i havnæringane.

FAGLEG RESSURS

Linda Årvik

Ervik Group

  • Linda Årvik arbeider i Ervik Group, eit konsern med røter i Måløy og verksemd innan både fiskeri, foredling og eksport. Ho har lang erfaring frå næringa og eit sterkt engasjement for vidareutvikling av kvitfisksektoren.

    Som del av fagressursane i planlegginga av konferansen har ho delt sine perspektiv på korleis fiskeri- og havbruksnæringa kan utvikle seg i møte med nye krav og marknader.

FAGLEG RESSURS

Siri Solbakken

Selstad

  • Siri Solbakken representerer Selstad, ein global leverandør av utstyr og tenester til fiskeri- og havbruksnæringa. Ho har inngåande kjennskap til utviklinga av teknologi og løysingar som møter dei praktiske behova i næringa.

    I arbeidet med konferansen har ho bidrege som fagleg ressurs med innsikt i teknologiske moglegheiter og utfordringar for kyst- og oppdrettsnæringa.

FAGLEG RESSURS

Beate Grønnevik

COO, Hub for Ocean

  • I tillegg til å vere konferansier under konferansen har Beate Grønnevik også vore ein fagleg ressurs i arbeidet med konferansen. Med bakgrunn frå leiing, merkevarebygging og næringsutvikling i både sjømat- og maritim sektor har ho bidrege med innsikt i korleis programmet kan spegle dei viktigaste utfordringane og moglegheitene næringa står overfor.

Ofte stilte spørsmål / Praktisk informasjon

  • Måløy ligg på kysten i Vestland fylke. Du kan kome hit med bil via E39/rv. 15/rv. 616, med buss frå Oslo, Nordfjord, Førde eller Ålesund, med hurtigbåt frå Bergen, med fly til Sandane(Anda), Florø eller Ørsta/Volda(Hovden), og vidare transport derifrå.

    Meir info om båtruter Bergen-Måløy finn du HER.

    Søk etter bussreise HER.

  • Vi har halde av eit avgrensa antal rom på Thon Hotel Måløy som kan bookast direkte i billettsystemet når du kjøper billett til konferansen.

    Dersom du allereie har meldt deg på, men gløymde å reservere hotellrom, kan du ta kontakt med oss på hei@maloyvekst.no, så hjelper vi deg!

  • Konferansen blir avheldt hovudsakleg på norsk.

  • Lokalet har universell utforming. Ta gjerne kontakt med oss dersom du har behov for ekstra tilrettelegging!

  • Ja, det blir arrangert festmiddag etter konferansen. Du kan melde deg på ved å kjøpe billett HER!

  • Konferansen er primært fysisk, men digitale billettar vil bli lagt ut kort tid i forkant av konferansen.

  • Har du spørsmål, ta gjerne kontakt på hei@maloyvekst.no! Då når du fleire i arrangørgruppa, og vi vil hjelpe deg så raskt som mogleg!

  • Presse er hjarteleg velkomne til å delta på konferansen! Ta gjerne kontakt god tid i forvegen slik at vi får sikra pressepass og presseplass med bord og tilgang til straum!

    Ta kontakt med hei@maloyvekst.no!